KISAH BAHASA BANJAR "MAMUJI MAMBAWA RAZAKI, MAHINA MAMBAWA CALAKA

 

MAMUJI MEMBAWA RAZAKI, MAHINA MEMBAWA CALAKA.

 oleh Beruhuy Loekaas (Rajudin S.M)

Alkisah ada sabuah kampung nang bangaran Kampung Tandui. Kampung ini babalakangan lawan sungai jadi kabiasaan urang di kampung ini kabila mandi, batapas, pasti samunyaan di sungai. Takisah jua di Kampung Tandui ada dua urang nang bangaran Galuh Intan wan Galuh Idang nang rumahnya batatai bahigaan.

Galuh Intan ini lembut banar pandirannya kalawan nang tuha batata bujur, tabalik lawan parangainya si Galuh Idang. bila bapandir kalawan urang liwar kada baadab jadi banyak nang kada katuju lawan inya. tapi Galuh Intan kada parnah abut kalawan sifatnya si Galuh Idang.

Hari itu sungsung galuh intan wan Galuh Idang kasungai handak batapas. Lagi kaasikan batapas, sakalinya tapih bahalai ampunnya Galuh Intan larut. Limbah batapas hanyar sadar si galuh intan sabuting tapihnya kadada, jadi batakunan lawan galuh idang,

“dang, ikam ada talihat kah tapih bahalai yu?”,

 “nah Kada tahu aku, ikam tu nah kada parhatian lalu, larut kalo” basuara nyaring ujar galuh Idang.

“bisa jua pang lah larut. Mun kaitu hakun lah menggani akan aku ka hilir mencari tapih” Galuh Intan manjalaskan.

“koler nah, nyawa sorang bisa ai kalo. Salang minta gani akan. Tuha sudah” sahut Galuh Idang

Akhirnya Galuh Intan bajukung saurangan tuju ka ilir mencarii tapih nintu, sambal bakayuh Galuh Intan sampai ka kampung subalah, jadi Galuh Intan batakun lawan acil-acil yang lagi batapas di pinggir sungai.

“acil minta rela ulun, ulun handak betakun kalawan  pian. pian ada malihatkah tapih ulun larut?”

“nah kadida luh ae, suba pang ikam datangi kasubalah, kalo pina larut sampai kesana” sahut acil

“inggih cil, ayuja ulun bakayuh lagi kakampung subalah” sahut Galuh Intan”

Bakayuh pulang Galuh Intan mencari tapih balahainya sampai dikampung subalahnya, galuh intan manakuni pulang lawan acil-acil yang lagi takumpulan dipinggir sungai itu.

“acil minta rela ulun, handak batakun, buhan pia adakah malihat tapi larut disini?”ujarnya Galuh

“eh Galuh, nah buhan kami asa kadada talihat pang. Hanyar aja kami kasungai an nah”sahut salah satu acil

“iyakah, ayuja ulun bakayuh ai pulang kasubalah, kalu pina larut sampai kasana”ujar Galuh Intan

“ayuja galuhae, jangan tapi kailir banar lah. Parak lawan sarang raksasa” sahuti acil

“inggih terima kasih cil, papadah pian” jar Galuh Intan

Jadi di Banua situ pahujungan kampung, ada raksasa dua laki bini yang hidup berdampingan wan  manusia. Inya kada bisa mahaur urang, tapi bila inya dihaur bisa hamuk banar. kalabihan dari Raksasa ini, kabila urang baik inya baik jua, tapi kabila ada nang jahat wan inya maka dibalasnya jua kajahatan nintu.

Imbah bapandiran wan bubuhan acil, galuh intan mangayuh jukung lagi tuju ka ilir. Kada sampai barapa lawas , Galuh Intan tatamu wan saurang nini-nini. Sidin lagi menyiang iwak. Imbahnya galuh intan baparak kalawan nini ngintu manakuni parihal tapih nya nang larut.

“ni, minta rela ulun. Umpat batakun, pia nada malihat kah disungai ini tapih bahalai larut” ujar Galuh

“eh cu. Adaai cu ae tadi malihat. Hanyar aja am tadi dibawa raksasa bini kasarangnya yang dimuhara guha situ” nini bapandir sambal menunjuk arah tempat raksasa badiam.

“aduh kayapa yu ni, ulun kada wani mun meambil kasana” jar Galuh Intan

“kada papa cu ae, raksasa ini asal jangan dihaur atawa di ganggu aja, buhan inya kada mahantam ka manusia, malah bila kita baik wan inya kita banyak dibarinya macam-macam, datangi ha kada papa” ujar nini.

“inggih ni minta rela ulun”

Jadinya Galuh Intan langsung mendatangi sarang raksasa. Babaya parak sudah tadangar nyaring suara anak raksasa manangis. Rasa sakit kepala Galuh intang mendangarnya. Tapi karena sudah taniat hati handak meambil tapihnya, akhirnya Galuh Intan tatap baparak. Imbah sudah sampai dimuhara Galuh Intan batamu wan raksasa bini. Rambutnya ikal panjang, matanya pina habang-habang banyala, kulitnya bawarna hijau tuha, awaknya tinggi ganal kurang labih 5 dapa. Raksasa bini ini langsung batakun apa hajat sampai datang kesarangnya. Galuh idang pun maungkapkan kahandak hatinya meambil Tapih Bahalainya yang didapat raksasa itu. Si raksasa bini pun paham akan tatapi ada syarat yang harus diakuri sagan meambil tapih ngintu. Galuh Idang disuruhnya mangguring akan anak raksasa yang hamuk manangis. Sakalinya manangis itu gara-gara kada mau guring. Galuh Intan Pun maakuri syarat dari Raksasa bini. Imbahnya Galuh Idang maayun lamah lambut akan anak raksasa sambal basyair.

Guring-guring anakku Guring

Guring diakan dalam ayunan

Guring-guring anakku guring

Matanya kalat bawa bapijim

 

ayun-ayun anakku ayuuun

Guring anakku sambal bapukung

Si pamurah hati wan pamurah lihum

Guring anakku, si bungas langkar lagi bauntung

 

Ampih manangis anak raksasa. Kanyamanan disyair diayun akan ulih galuh intan nang mardu suaranya. Imbah ngitu galuh idang bapandir wan raksasa bini bahwa sudah mengguring akan anaknya. Raksasa bini pun membulik akan Tapih Bahalai dan menjulung kampil nang batutup. Karena Si Raksasa bini itu himung banar karena anaknya langsung nyanyak guring, jadi inya membari hadiah jua gasan Galuh Intan dan disuruhnya membukanya kaina imbah sudah dirumah.

Galuh intan pun bulik, himung tapih tabulik dapat hadiah pulang dari Raksasa Bini. Imbah sampai dipalataran rumah, ada rasa panasaran kalawan kampil, dibuka langsung kampil ngintu. Sakalinya hibak lawan amas barlian. Takajut Galuh Intan langsung maucap Takbir. Basujud syukur karena dapat hadiah nang luar biasa. Galuh Idang nang dihiga rumah pun bingung malihat galuh intan kaya ngintu. Akhirnya inya baparak wan batakun kawalan Galuh Intan. Galuh Intanpun mancarita akan mulai pamulaan sampai bulik karumah wan dibarinya utas amas gasan Galuh Idang.

Malam harinya bapikiran jua si Galuh Idang ini, bahiri jua wan harta yang didapatkan Galuh Intan. Ujarnya dalam hati “mun Galuh Intan aja dapat, masa aku ini kada. Supan aku. Mun kaya itu esok tapih ku sungsung ku larut akan kasungai jua, kena mun aku dapat jua, kada ku bari tupang Galuh Intan. Sudah banyak aja bisi amas barlian saurang”

 

Sungsung pada biasa galuh idang kasungai manimbai tapih bahalainya supaya larut. Imbahnya labih dadua jam. Galuh idang pun bajukung jua maumpati alur sungai, ada rasa takutannya dalam hatinya kalupina tapihnya sangkut wan kada sampai ka tampat raksasa bini.  Satiap ada urang dipinggir sungai pasti ditakuninya.

“uy Cil, ada kah malihat? tapih aku larut nah cil ae” ujar Galuh Idang

“aku. Aku! uma ikam ni dang. Kada baapik lalu muntung. Urang baparmisi kah dulu, pandiran kada batata, kada tahu nah kami” disahuti acil nang pina sangkal lawan Galuh Idang

Galuh idang malihati aja, manyhuti gin kada lawan buhan acil-acil. Imbahnya galuh idang mangayuh pulang jukung kada tahu-tahu, kada baparmisian. Karena Galung idang masih takutan kalo tapih nya  ka tempat raksasa bini. Inya takutan kalo pina tamandak dimanakah. Imbah Galuh Idang melihat urang dipinggir sungai ditakuninya pulang. Sama kaya tadi, muntung kada baapik, kada batata jadi urang yang disinggahinya berataan sangkal kalawan pandiran Galuh Idang. Kada berapa lawas inya sampai wadah nini. Galuh Idang batakun kalawan ini nini parihal tapihnya. Dan masih aja pandiran Galuh Idang ini kada baadab lawan nini. Tatapi nini kada marasa sangkal lawan Galuh Idang. Ditunjuk akan nini sarang Raksasa bini.

Imbah sampai ka muhara sarang, tadangar sudah nyaring suara anak raksasa manangis, imbah baparak ada rasa takutan jua dalam hari Galuh idang, tapi gara-gara kaingatan wan harta akhirnya diwani-waniakan Galuh Idang. Raksasa bini pun batakun ada hajat apa sampai Galuh Idang datang ke Sarangnya. Dan Galuh idang pun bepadah handak meambil tapihnya yang dibawa raksasa bini. Imbahnya Raksasa bini ini maajukan syarat yang sama lawan Galuh intan yaitu mangguring akan anaknya yang menangis. Imbah ngintu langsung Galuh idang basyair sambal maayun Anak

Guring-guring anak raksasa Guring

Guring raksasa dalam ayunan

Guring-guring raksasa guring

Umai Matanya habang lakasi bapijim

 

ayun-ayun anak raksasa ayuuun

Guring baayun sambil bapukung

Si rambut jangar, awak habang-hirang, hijau anum

Kuitannya tinggi ganal suara manggarugum

 

Anak Raksasa makin tambah banyaring manangis, jangankan Galuh Idang, Raksasa Bini aja langsung paning kapala mendangar anaknya sing nyaringan manangis. Karena sudah kada tahan akhirnya dijulung raksasa tapih bahalainya wan kampil sabuting imbah ngintu langsung disuruhnya Galuh Idang bajauh.

Karena sudah dapat hadiah kampil dari raksasa bini. Secapat kilat Galuh Idang bulik wan langsung masuk kadalam rumah, dikuncinya berataan lawang, lalungkang supaya kadada yang kawa malihatnya. Karena sudah kada sabar dibukanya ai kampil tadi. Sekalinya isinya lain amas barlian tapi binatang nangkaya pasan-pasan, halilipan, laba-laba, samut katikih, samut gatal, kararangga macam-macam tupang. Sebarataan mahurung Galuh Idang tadi, habis jingkar tupang awak Galuh Idang diiguti binatang-binatang ngintu.