Naskah Bapandung " AMAS TU MURAH, WAKTU NANG LARANG "

 

AMAS TU MURAH, WAKTU NANG LARANG

Beruhuy Loekaas 

Tokoh Pemandungan     : Babinian

-----------------------------------------------------------------------------------------------------------------------------

(PANTUN SYAIR :             inilah palita andak bamija, kadalam rumah dinyala akan

inilah carita parak bamula, kalawan bismillah dibuka akan)

MAMAKAI BAJU DASTAR WAN TANGKULUK DI KAPALANYA SAMBIL MEMBAWA BUNTALAN NANG DIINGKUTI DIPINGGANG MASUK KATANGAH PANGGUNG. DI PANGGUNG SUDAH DISEDIAKAN KURSI.

PAKAIAN ACIL : Uyyyyy sahutilah…Assalamu alaikuuuuuum. Nang manyahuti salam ulun pasti bapahala wan babau surga, babau harum. Hen

 

Ulun jadi kasini handak bapandung nang ulun bari judul Amas tu Murah, Waktu nang Larang. Ini Kisah bahari pang lah. Nah kaini caritanya lah, Tahulah bubuhan Pian Wahini kakanakan ngini ngalih bangat di kuntrul. Ulun sebagai acil acil ras manusia tarkuat di bumi, bila kendaraan barehteng kakiri nah ulun biluknya kakanan. Heehehe. Jadi Ulun ini resah banar pian. Ulun disambati katinggalan jaman ujar. Kada paham lawan Jaman canggih ujar. Tahulah kakanakan nang main gim kada baampihan, nang bila sudah main Kuciak-kuciak kada mangaruan. 

 

MENCONTOHKAN MAIN GAME ONLINE DENGAN SMARTPHONE

“Nah sarang-sarang! Itu nah musuhnya! Ommma kawani  aku, kawani aku! Ya Allah buta map! Bih!."

Hin kayaitu kam Kanakan ngini, Aur gim haja. Kada ingat lagi diwaktu. Sama si Amat tu nah kaya itu jua, sumbahyang mengkodo, makan mengkodo, sawat kaparluan buang hajat di kodo jua.

 

SAMBIL BERGANTI KE PAKAIAN AMAT PAKAI SERAGAM SEKOLAH “Hidihhh hidihhh (MENCONTOHKAN MAIN GAME ONLINE DENGAN GERAKAN MENAHAN BAKAMIH), uyy kasi pank kalah akan, nah kenapa babulik pulang, itu nah rumah musuh handak hancur! Aduhai kada tahan lagi nah! Aduhhh aiiiii, tinggal akan aja dlu nah” (MAANDAK HP KE KURSI LALU KISAH BUKAH HANDAK BAKAMIH).

SAMBIL BERGANTI KE PAKAIAN ABAHNYA AMAT Han tia bakamih bahira aja handak di tundanya. Kada sihat sama sekali hidup, iya yang jadi penyakit kencing batu tu, sawat buang hajat aja di tahan-tahan.

Nah pas si amat tadi bukah ka jamban, abahnya amat ini datang lalu malihat HP amat banyalaan di kursi. Ni kisahnya ulun jadi abahnya lah. Jadi jar abahnya “nangapa ngini hp banyalaan haja, nah ada napa ngini bagarak-garak (SAMBIL MAUDAK HP AMAT NANG BANYALAAN).

 

Karena abahnya kada tahu di gim unlin diudak abahnya amat ai hpnya sampai kalah gim nang di mainkan amat, kada sampat lawas abah amat datang.

“kanapa bah pian udak hp ulun, habis kalah am ulun main gim” jadi jar abahnya “ikam hape banyalaan ditinggalakan urang matii dulu, mana tahu abah, sumbahyang sudahlah”. Disahuti amat “anu balum bah ae, kena bah lah, sekali lagi main hanyar sumbahyang ”.

 

 (ABAHNYA AMAT LANGSUNG SARIK BAMAMAI) “YA Allah mat, ini separapat jam lagi ashar handak kada basumbahyangan kah, ikam ni baju balum baganti, awak bau hangit, sumbahyang balum,  handak jadi nangapa! Hp tarus di udak”

 lalu disahuti amat pulang abahnya “pian ni bah ae kada mangarti, ulun dalam hp ini jadi pahlawan, diakui kakawanan, tahulah pian, ulun ini di puji-puji kakawanan, kada bangga lah pian lawan ulun, harusnya pian himung, ini malah bamamai” lalu abahnya amat ini mulai bapandir bagamat, memadahi secara baik-baik

Jar abahnya amat “mat cuba dangari abah, abah ini kada manangati ikam maudak hp, Cuma abah ni takutan kalu ikam tinggalam kada kawa babulik lagi, abah paham main gim ini bisa jadi hiburan bahkan bisa jadi paluang. Tapi ikam harus tahu di batas. ada waktu sagan belajar, ada waktu sagan sumbahyang, ada waktu sagan guring, makan, bakamih bahira sagala macam. Ini nah ikam balum sumbahyang, busiah tatinggal akan, masuk Naraka, mun ikam masuk Naraka, abah taumpat-umpat masuk Naraka, bakawan am kita badua di Naraka, kasian mama ikam sorangan di surga, kada mungkin kalo kita bawai jua ka Naraka. Kada handak kalo”

imbah dipadahi abahnya mandam si amat ini. pinanya amat ini mulai sadar imbah abahnya mamadahi. Kada sampat lawas umanya amat datang SAMBIL BEGANTI KE PAKAIAN DASTAR “han mat dangari abahmu ini, main gim tu jangan kalimpatan labih, ikam tangah malam kuciak-kuciak surangan, mangganggu urang mat ae, lawan kasihatan ikam taganggu jua akhirnya. Sumalam sudah sakali masuk rumah sakit kajadian lambat makan, lambat guring, bangun malandau, itu pank bila kada ingat diwaktu lagi. Kalawasan maudak hp tu kada bagus jua bisa marusak ka mata ikam kainanya. Kira-kira amat pahamai apa jar abah wan mama lah, imbah ini amat langsung baudhu langsung sumbahyang sawat haja lagi waktunya” nah jadi akhirnya mulai hari itu inya sudah sadar pentingnya membagi waktu, nilai sakulahnya baik, urangnya kada panggaringan, mana sampai si amat ini jadi pelatih E-Sport pulang han, ini karena inya bisa membagi waktu. Ulun sebagai umanya akhirnya bangga jua toh. Kada salah ujar papatah tu, Waktu Itu Labih Baharaga Daripada Amas. Gagara amat pintar maatur waktu wahini ulun banyak bisi amas. Hen apa habar buan pian.

 

Ayuja ulun handak pamit dulu lah, handak kapasar manukar amas pulang nah, barian duit dari amat. Jadi dalam panutup kisah ini ulun minta halal minta ridho bila ada tasalah ucap tasalah pandir. Sabalum ulun tulak, pantun dulu lah

PANTUN PENUTUP :       satu titik dua koma. ulun nang cantik siapa yang punya

                                                Minta maaf, jua minta rela. sekian wan terima kasih di akhir kata

 

 

Wassalamu alaikum warahmatullahi wabarokatuh